Bashkimi Evropian (BE) ka mbështetur ndërtimin e impiantit të ri për furnizimin me ngrohje qendrore të Gjakovës, i cili prodhon ngrohje dhe energji elektrike nga biomasa e drurit.

Ky është i vetmi impiant i kogjenerimit me biomasë në Kosovë, shkruan arbresh.info.

Burimet lokale të ripërtërishme sigurojnë furnizimin me energji dhe zëvendësojnë lëndët djegëse fosile të importuara.

“Impianti i ri i financuar nga BE-ja do të ketë ndikim domethënës ekonomik dhe mjedisor në Gjakovë. Kështu, niveli i përgjithshëm i ndotjes në zonë do të ulet për më shumë se 90%. Kostot e përgjithshme të projektit ishin mbi 15 milionë euro, duke përfshirë studimet përkatëse, mbikëqyrjen dhe punimet e ndërtimit”, thuhet në njoftim.

Inaugurimi i ngrohtores me Biomasë në Rezinë të Gjakovës do të bëhet të hënën, ku do të marrë pjesë edhe ambasador Tomáš Szunyog, Udhëheqës i Zyrës së BE-së/PPBE, zëvendësministri i Ekonomisë, Mentor Arifaj, kryetar i Gjakovës, Ardian Gjini,si dhe Albana Skivjani, UD Kryeshefe e Ngrohtores së Qytetit. /arbresh.info/